‘సలార్‌’, ‘కల్కి 2898 ఏడీ’ చిత్ర విజయాలతో జోరుమీదున్నారు ప్రభాస్. తాజాగా అయన కథానాయకుడిగా మరో చిత్రం తెరకెక్కనుంది. హను రాఘవపూడి దర్శకత్వంలో ఓ పీరియాడికల్‌ యాక్షన్‌ మూవీ రూపొందుతున్న సంగతి తెలిసిందే. ఇందులో కథానాయికగా సోషల్‌మీడియా స్టార్‌ ఇమాన్వీ ఎస్మాయిల్‌ను ఎంపిక చేశారు. ఈ సినిమాలో కథానాయికగా ఆమెను ఎంచుకోవడంపై దర్శకుడు హను రాఘవపూడి స్పందించాడు . తాజాగా ఓ ఇంటర్వ్యూలో అయన మాట్లాడుతూ … సామాజిక మాధ్యమాల వల్ల కొత్త టాలెంట్‌ను వెతికి పట్టుకోవడం సులభమైందన్నారు.
‘‘ప్రస్తుత రోజుల్లో కొత్త టాలెంట్‌ను వెలికితీయడంలో సామాజిక మాధ్యమాలు కీ రోల్ పోషిస్తున్నాయని అన్నాడు. తమ కథకు అనుగుణంగా నటీనటులను ఎంపిక చేసుకోవడంలో ఫిల్మ్‌మేకర్స్‌కు సోషల్‌మీడియా ఎంతో సాయం చేస్తుంది. ఇమాన్వీ అందం, ప్రతిభ కలిగిన అమ్మాయి. అందరిలాగానే నేనూ ఆమె డ్యాన్స్‌ వీడియోలు చూస్తుంటా. ఆమె మంచి భరతనాట్యం డ్యాన్సర్‌. కళ్లతోనే ఎన్నో హావభావాలను పలికిస్తుంటుంది. అందుకే ఆమెకు ఒక అవకాశం ఇవ్వాలనుకున్నా’’ అని హనుచిత్ర దర్శకుడు హను రాఘవపూడి తెలిపాడు. ఆడిషన్స్‌, స్క్రీన్‌ టెస్ట్‌ అనంతరమే ఆమెను ఎంపిక చేసినట్లు ఆయన తెలిపారు. ఆమెను సెలెక్ట్‌ చేయడం తన ఒక్కడి నిర్ణయం కాదని.. చిత్రబృందం మొత్తం నిర్ణయమని ఆయన తెలిపారు.
మైత్రీ మూవీ మేకర్స్‌ పతాకంపై ఈ చిత్రం తెరకెక్కనుంది. ఇటీవల ఈ సినిమాకు సంబంధించి పూజా కార్యక్రమం జరిగింది. విభిన్నమైన కథ, భారీ బడ్జెట్‌తో తెరకెక్కనున్న ఈ చిత్రానికి ‘ఫౌజీ’ అనే టైటిల్‌ ప్రచారంలో ఉంది. ఇక ఈ చిత్రానికి కథానాకురాలుగా ఎంపికైన ఇమాన్వీ ఇన్‌స్టాగ్రామ్‌ స్టార్‌గా యువతకు సుపరిచితురాలు. హిందీతో పాటు, తెలుగు, తమిళ పాటలకూ ఆమె వేసే స్టెప్‌లు ఎంతగానో అలరిస్తాయి. దాదాపు 7 లక్షల మంది ఆమెను ఫాలో అవుతున్నారు. ఈ సినిమా ప్రకటించిన తర్వాత ఆ సంఖ్య మరింత పెరిగింది.
