కేంద్రంలో ఎన్డీయే కూటమి కొత్త ప్రభుత్వం కొలువుదీరనుంది. ఇటీవల జరిగిన ఎన్నికల్లో విజయం సాధించిన కూటమి నుండి ప్రధాని బాధ్యతలు చేపట్టేందుకు నరేంద్రమోదీ సిద్ధమవుతున్నారు. ఆయన ప్రమాణ స్వీకారానికి ముహూర్తం ఖరారైంది. జూన్‌ 9 న మోదీ ప్రమాణస్వీకార కార్యక్రమం జరగనుంది. ఈ వేడుకకు ఎన్డీయే కూటమి నేతలు, పలు రాష్ట్రాల ముఖ్యమంత్రులు హాజరుకానున్నట్లు సమాచారం.
మంగళవారం నాటి ఫలితాల్లో ఎన్డీయే కూటమికి స్పష్టమైన ఆధిక్యం వచ్చింది. దింతో ప్రభుత్వ ఏర్పాటుకు బీజేపీ కార్యాచరణ మొదలుపెట్టింది. ఇప్పటికే ప్రధాని మోదీ నివాసంలో కేంద్ర కేబినెట్‌ చివరిసారిగా భేటీ అయ్యింది. ప్రస్తుత లోక్‌సభ రద్దుకు సిఫార్సు చేసింది. ఈరోజు సాయంత్రం ఎన్డీయే భాగస్వామ్య పక్ష నేతల కీలక సమావేశం జరిగింది. ఈ సమావేశంలో మోదీని ఎన్డీయే పక్ష నేతగా కూటమి నేతలు ఏకగ్రీవంగా ఎన్నుకున్నారు. శుక్రవారం బీజేపీ , ఎన్డీయే పార్లమెంటరీ పార్టీ భేటీ కానుంది. అనంతరం ప్రభుత్వ ఏర్పాటుకు ఆహ్వానించాలని కోరుతూ ఎన్డీయే కూటమి ఎంపీలతో కలిసి రాష్ట్రపతిని కలవనున్నారు మోదీ.
